لەچوارچێوەی هەوڵەکانی زانکۆی گەرمیان بۆ خزمەتکردن و پاراستنی ناوچە شوێنەواری و مێژووییەکانی گەرمیان، پرۆژەی دۆکیومێنتکردن و پۆلێنکردنی شوێنەوارە مێژووییەکانی کفری ئەنجامدەدات و بۆ ئەو مەبەستەش یەکەم کۆبوونەوە لە سەرۆکایەتی زانکۆ ڕێکخرا.
ڕۆژی دووشەممە (٢٥ـی ئابی ٢٠٢٥)، لیژنەی سەرپەرشتیکردنی پرۆژەی دۆکیومێنتکردن و پۆلێنکردنی شوێنەوارە مێژووییەکانی کفری بە سەرۆکایەتی ( پرۆفیسۆر د.ئاراس فەریق زەینەڵ) سەرۆکی زانکۆی گەرمیان و (ساهیر عەلی جاسم) قایمقامی قەزای کفری و ( ساڵح محەمەد سەمین) بەڕێوەبەری شوێنەوار و کەلەپوری گەرمیان و (عەلی خورشید) سەرۆکی شارەوانی کفری و (عوبێد محەمەد) بەڕێوەبەری شوێنەوار و کەلەپوری کفری، یەکەمین کۆبوونەوەیان سازکرد.
ئامانجی پرۆژەکەی زانکۆی گەرمیان، کۆکردنەوە و بە بەڵگەنامەکردنی داتا و زانیاریی پەیوەندیدار بەهەموو شوێنەوارە مێژووییەکانی کفری و دوبارە دروستکردنەوەی نەخشە و سێکشنی خانووە کۆنەکان، تۆمارکردنی وردەکاری بیناکان بە شێوەی زانستی و فۆرمال، هەروەها پۆلێنکردنی شوێنەوارەکان لەسەر بنەمایی مێژووی درووستکردنیان، جۆری مەوادی بەکارهاتوو و ستایڵە بیناسازییەکانیانە.
لە بەشێکی کۆبوونەوەکەدا، سەرۆکی زانکۆی گەرمیان ئاماژەی بە گرنگی پرۆژەکە کرد و ڕایگەیاند: پرۆژەی دۆکیومێنتکردن و پۆلێنکردنی شوێنەوارە مێژووییەکانی کفری گرنگی تایبەتی هەیە لەوانە:
1. پاراستنی ناسنامەی مێژوویی و کەلتوری: ئەم شوێنەوارانە هۆکارێکی گرنگن بۆ بیرخستنەوەی مێژوو و ناسینەوەی رەوتی ژیان و ئاستی تەکنەلۆژیای بیناکاری لەڕۆژگاری کۆن لە ناوچەکەدا، بۆیە دۆکیومێنتکردنیان دەبێتەهۆی پاراستنی کەلتور و مێژووی شاری کفری.
2. سەرچاوەی زانستی بۆ توێژینەوە: زانیاری کۆکراوە و بەڵگەنامەکراوەکان دەبن بە بنەمایەکی بەهێز بۆ توێژەرانی بواری کەلتور و مێژووی بیناکاری ناوچەکە.
3. ڕێنمایی بۆ پاراستن: ئەم پرۆژەیە سەرجەم شوێنەوارەکان پۆلێن دەکات و رێنمایی و رێکاری تایبەت بە پاراستنی شوێنەوارەکان پێشکەش بە لایەنی پەیوەندیدار دەکات، تاوەکو لە داهاتوودا بتوانرێت سوودی لێ وەربگیرێت بۆ نۆژەنکردنەوەی هەریەک لەو شوێنە
هەر لە کۆبوونەوەکدا، کە هەریەکە لە (د.فکرەت لەتیف) سەرۆکی بەشی ئەندازیاریی شارستانی زانکۆی گەرمیان و (م.گەیلان مستەفا) بەڕێوەبەری ئەندازە و پرۆژەکانی زانکۆی گەرمیان ئامادەبوون، بڕیاردا لیژنەیەکی باڵا لەنێوان زانکۆی گەرمیان و زانکۆی سلێمانی و لایەنە پەیوەندیدارەکانی ناوچەکە پێکبهێنرێت و نەخشەیەکی بنەڕەتی تایبەت بە شوێنەوارەکانی کفری دروست بکرێت.