ڕۆژی یەکشەممە (٢٦ـی کانونی دووەمی ٢٠٢٥)، شاندێکی باڵیۆزخانەی ئەمریکا لە بەغداد، سەردانی سەرۆکایەتی زانکۆی گەرمیانیان کرد و لەلایەن (پرۆفیسۆر د.ئاراس فەریق زەینەڵ) سەرۆکی زانکۆی گەرمیانەوە پێشوازییان لێکرا.

شاندەکەی باڵیۆزخانە پێکهاتبوو لە (فیلیپ سیندی) ڕێکخەری گشتی پرۆگرامەکانی خوێندن و ڕاوێژکاری پەروەردەیی لە باڵیۆزخانەی ئەمریکا لە عێراق و (هەندرێن باڵەکی) ڕێکخەری پرۆگرام و سکۆڵارشیپ و تاقیکردنەوە نێودەوڵەتییەکان لە ڕێکخراوی ئەمریکی (ئەمیدیست Amideast).

لەدیدارێکدا، کە (پرۆفیسۆری یاریدەدەر د.محەمەد ئیبراهیم خەلیل) یاریدەدەری سەرۆکی زانکۆ بۆ کاروباری زانستی و خوێندنی باڵا، (پرۆفیسۆری یاریدەدەر سالار محمود) بەڕێوەبەری پەیوەندییە ئەکادیمییە نێودەوڵەتییەکان و (مامۆستای یاریدەدەر چنور مەحمود) بەڕێوەبەری سەنتەری پەرەپێدانی کار ئامادەبوون، سەرۆکی زانکۆ بەخێرهاتنی شاندەکەی باڵیۆزخانەی کرد و ئامادەیی زانکۆی بۆ کاری هاوبەش و هەماهەنگی زیاتر دووپاتکردەوە.

(پرۆفیسۆر د.ئاراس فەریق زەینەڵ) ئاماژەی بەوەکرد، زانکۆی گەرمیان و ناوچەکەش پڕە لە توانا و وزەی زۆر، بۆیە لە هەموو بوارەکاندا پێویستی بە ئاوڕلێدانەوە و بێبەش نەکردنی ناوچەکەیە لە پرۆگرام و بەرنامە جۆربەجۆرەکانی ئەمریکا لە عێراق.

لایخۆیەوە ڕێکخەری گشتی پرۆگرامەکانی خوێندن و ڕاوێژکاری پەروەردەیی لە باڵیۆزخانەی ئەمریکا، باسی لە بایەخی پێگەی جوگرافی زانکۆی گەرمیان کرد و وتیشی: بەدڵنیاییەوە چالاکییەکانمان لە گەرمیان فراوان دەکەین.