ڕۆژی دووشەممە (٢٧ـی تشرینی یەکەمی ٢٠٢٥)، (پرۆفیسۆر د.ئاراس فەریق زەینەڵ) سەرۆکی زانکۆی گەرمیان، پێشوازیکرد لە شاندێکی زانکۆی نێودەوڵەتی قەیوان، کە بەمەبەستی دروستکردن و پەرەپێدانی پەیوەندییە زانستییە ئەکادیمییەکان سەردانی زانکۆکەیان کردبوو.

شاندەکەی زانکۆی نێودەوڵەتی قەیوان، کە پێکهاتبوون لە (پرۆفیسۆر د.موهد ئەزرای قاسم) سەرۆکی زانکۆ و (د.زانا عەبدولکەریم) یاریدەدەری سەرۆکی زانکۆ بۆ کاروباری کارگێڕی و دارایی و (د.زانا جەمال کەریم) ڕاگری کۆلێجی زانستە تەندروستییەکان، گفتوگۆیان لەبارەی وردەکاری چۆنێتی گەشەپێدانی پەیوەندی ئەکادیمی و زانستی و خستنە خزمەتی هەردوو زانکۆی گەرمیان و قەیوان کرد.

هەر لەو دیدارەدا کە (پرۆفیسۆری یاریدەدەر د.محەمەد ئیبراهیم خەلیل) یاریدەدەری سەرۆکی زانکۆی گەرمیان بۆ کاروباری زانستی و خوێندنی باڵا و (پرۆفیسۆری یاریدەدەر سالار محمود) بەڕێوەبەری پەیوەندییە ئەکادیمییە نێودەوڵەتییەکان ئامادەیبوون، شاندی میوان داواکاربوون زانکۆی گەرمیان هاوکار و هەماهەنگ بێت لە کردنەوەی خوێندنی باڵا لە زانکۆی نێودەوڵەتی قەیوان، لایخۆیەوە (پرۆفیسۆر د.ئاراس فەریق زەینەڵ) جەختیکردەوە لە بەدەمەوەهاتنی زانکۆی گەرمیان و ئامادەی هەموو هاوکارییەکانی سەرۆکایەتی زانکۆی لەوبارەیەوە خستەڕوو.

دواتر، لە هۆڵی ئەنجومەنی زانکۆی گەرمیان، یاداشتی لێکتێگەیشتن لەنێوان هەردوو زانکۆ، لەلایەن (پرۆفیسۆر د.ئاراس فەریق زەینەڵ) و (پرۆفیسۆر د.موهد ئەزرای قاسم) واژۆکرا.

لە گرنگترین خاڵەکانی نێو یاداشتی لێکتێگەیشتنەکەدا هاتووە، هەردوو زانکۆ بەشداری بە خوێندکاران و مامۆستایانیان دەکەن لە کۆرسە کورتخایەنەکان لە زانکۆکانی یەکتر، هاوکات ئاشناکردن و گەشتی زانستی خوێندکارانی هەردوولا بە زانکۆکانی بەرامبەر، ئەنجامدانی کۆنفرانسی زانستی نێودەوڵەتی هاوبەش بەتایبەت لە بوارە پزیشکی و زانستییەکاندا، هاوکاریکردنی زانکۆی گەرمیان لە دروستکردنی پەیوەندی لەگەڵ زانکۆکانی مالیزیا.

دواتریش شاندی میوان، هۆڵ و تاقیگە پزیشکییەکانی کۆلێجی پزیشکی و بەشە زانستییەکانی کۆلێجی پەروەردەیان لەنێو کەمپی سەرەکی زانکۆ لەبەردەسوور بەسەرکردەوە.

زانکۆی نێودەوڵەتی قەیوان، لە ساڵی (٢٠١٨) وەک بەشێک لە زانکۆی (UTM)ی مالیزیا، لە شاری سلێمانی دامەزراوە.