‎ڕۆژی دووشەممە، ڕێکەوتی (٢٠ـی تشرینی یەکەمی ٢٠٢٥) لە مەراسیمێکدا بە ئامادەبوونی (پرۆفیسۆر د.ئاراس فەریق زەینەڵ) سەرۆکی زانکۆی گەرمیان، بڕوانامە بەسەر بەشداربووانی خولی هەشتەمی پێداگۆجی دابەشکرا.

‎لە مەراسیمەکەدا کە هەریەک لە یاریدەدەرانی سەرۆکی زانکۆ و ڕاگری کۆلێجی زانست ئامادەبوون، بڕوانامە بەسەر (٤٥) بەشداربووی خولی پێداگۆجی دابەشکرا، کە لەماوەی شەش مانگی ڕابردوودا لەلایەن بەڕێوەبەرایەتی سەنتەری ڕاهێنانی پێداگۆجی و پەرەپێدانی ئەکادیمی زانکۆی گەرمیانەوە، ڕاهێنانیان پێکرابوو.

‎لە وتەیەکدا، (پرۆفیسۆر د.ئاراس فەریق زەینەڵ) باسی لە ڕۆڵ و گرنگی خولی پێداگۆجی لە باشترکردنی کوالێتی خوێندن و بەرزکردنەوەی ئاستی زانست و زانیاری و لێهاتوویی مامۆستا و خوێندکار کرد، هاوکات سوپاس و دەستخۆشی لە ستافی بەڕێوەبەرایەتی سەنتەری پێداگۆجی زانکۆی گەرمیان کرد و وتی: جێی شانازی زانکۆیە کە ستافی سەنتەرمان لەسەر ئاستی وەزارەت و زانکۆکانی هەرێمدا یەکێکە لە باشترین سەنتەرەکانی ڕاهێنانی پێداگۆجی.

وتیشی: لەگەڵ وەرگرتنی ئەم بڕوانامەیەدا بەرپرسیارێتییەکی گەورەتان دەکەوێتە ئەستۆ، بەرپرسیارێتی ئەوەی کە ئەو زانیاری و توانایەی وەرتانگرتووە بیخەنە بواری کردار و ببنە هۆی باشترکردنی کوالێتی پەروەردە لە دامەزراوەکانتاندا و ببنە بەشێک لە گۆڕانکاری ئەرێنی لە سیستەمی پەروەردەماندا.

‎لە کۆتایی مەراسیمەکدا، لەڕێگەی نمایشکردنی پۆستەرەوە هەر گروپێکی بەشداری خولەکە، پرۆژەی کۆتایی خۆیان نمایشکرد و بڕوانامەیان پێبەخشرا.