‎سەرلەبەیانی ئەمڕۆ (۲٠۲٤/۱٠/۳۱)، وەکو بەشێک لە چالاکییەکانی پرۆژەی (Heritage Horizons)، تیمێکی زانکۆی بۆڵۆنیا لە وڵاتی ئیتاڵیا، کە لە هەمان کاتدا ئەندامی ڕێکخراوی (MiSAK)ـن، سەردانی زانکۆی گەرمیانیان کرد.

‎بە ئامادەبوونی (پ.ی.د. محمد ئیبراهیم) یاریدەدەری سەرۆکی زانکۆ بۆ کاروباری زانستی و خوێندنی باڵا، کۆبوونەوەیەک لەگەڵ  تیمەکەی زانکۆی بۆڵۆنیا و ئەندامانی پرۆژەکە لە هەریەک لە زانکۆی گەرمیان، بەڕێوەبەرایەتی شوێنەوارناسی گەرمیان و بەڕێوەبەرایەتی گەشتوگوزاری گەرمیان بەڕێوەچوو.

‎شایەنی باسە، پرۆژەی (Heritage Horizons) پرۆژەیەکی نێودەوڵەتی کورتخایەنی هاوبەشە لە نێوان زانکۆی بۆڵۆنیا، زانکۆی گەرمیان، بەڕێوەبەرایەتی شوێنەوارناسی گەرمیان، بەڕێوەبەرایەتی گەشتوگوزاری گەرمیان، ڕێکخراوی (MiSAK)، و پەیمانگەی نێودەوڵەتیی فەرهەنگیی کوردی. پرۆژەکە ماوەیەکە دەستی بە کارەکانی کردووە و تاوەکو مانگی پێنجی ۲٠۲٥ بەردەوام دەبێت. ئامانجی پرۆژەکە خزمەتکردنە به شوێنەوارەکانی دەڤەری گەرمیان لەپێناو ڕێکخستنەوه و خزمەتكردن و پارێزگاريكردن لێیان و ناساندنيان وەك شوێنى گەشتیاری بەڕێگەی مودێرن، کە بەپێی پرۆپۆزەڵى پرۆژەكه داڕێژراوە.