پوختەیەك لەسەر سەنتەری جینۆساید:
ئەم سەنتەرە بەپێی فەرمانی وەزاری/دەزگای سەرپەرشتی و دڵنیایی جۆری/بەڕێوەبەرایەتی جۆری و متمانەبەخشین ژمارە (15922) لە (21/8/2023) و بەپێی فەرمانی زانكۆیی ژمارە (318) لە (17/1/2024) دامەزراوە.
ئەم سەنتەرە بریتییە لە ناوەندێكی ئەكادیمی بۆ لێكۆڵینەوەی زانستی لە سەرجەم ئەو بوارو لایەنانەی كە تایبەتن بە تاوانەكانی جینۆساید چ لەسەر ئاستی نێوخۆیی چ لەسەر ئاستی نێودەوڵەتی كە بەدرێژایی مێژووی مرۆڤایەتی ڕوویانداوە، كە دژ بە گەلی كورد و گروپە نەتەوەیی و ڕەگەزی و نەژادی و ئاینییەكانی تر ئەنجامدراون.
ئەرک و ئامانجی ئەم سەنتەرە:
بەجیهانیناساندنی جینۆسایدی گەلی كورد لەسەر ئاستی عێراق و نێودەوڵەتی و ڕێكخراوە نێونەتەوەییەكان.
ئەرشیفكردن و بەدۆكیۆمێنتكردنی بەڵگەنامەكان تایبەت بە تاوانەكانی جینۆساید و ئەنفال دژ بە گەلی كورد و مرۆڤایەتی لەپێناو پاراستن و مانەوەیان لەلایەك و لەلایەكی ترەوە ئەنجامدانی توێژینەوەی زانستی و كتێب و بڵاوكراوەكان لە بارەیانەوە.
خستنەگەڕی هەموو توانا زانستییەكان لە ناوەوە و دەرەوەی زانكۆ بۆ ئەنجامدانی توێژینەوەی زانیستیی جۆراوجۆری وەك لە بوارەكانی دەروونی و كۆمەڵایەتی و یاسایی و مێژوویی و زمانی و كەلتوری و ...تد لە سەرجەم ڕەهەندە جیاوازەكانی تاوانی ئەنفال و جینۆسایدی گەلی كورددا.
هۆشیاركردنەوە و زیندووڕاگرتنی ئەم تاوانانە لە بیر و هزری تاكی كورد و مرۆڤایەتییدا، هاوكات چەسپاندن و دانانی پرۆگرامی تایبەت بەم تاوانانە لە ناوەندەكانی خوێندن لە دامەزراوەكانی حكومەت بەتایبەت وەزارەتی پەروەردە و خوێندنی باڵا.
هەماهەنگی لەگەڵ سەنتەرەكانی هاوشێوە لەسەر ئاستی نێوخۆیی و دەرەكی لەپێناو كاركردنی بەكۆمەڵ (دەستەجەمعیە) بۆ زیاتر بەهێزكردنی ناساندنی كەیسی جینۆسایدی كورد.
هەماهەنگی لەگەڵ ڕێكخراوە نێوخۆیی و نێودەوڵەتییەكان لەپێناو خزمەتكردنی كەیسی ئەنفال و جینۆساید و ئەنجامدانی كارو چالاكیی فرەجۆر.
ناوی بەڕێوەبەر: پ.د. ئومێد بەرزان برزو سعید
پەیکەری کارگێڕیی سەنتەر:
ئەم سەنتەرە لە ڕووی كارگێڕییەوە بە پلەی بەڕێوەبەرایەتی دێت و سەر بە نوسینگەی سەرۆكی زانکۆمانە، لە چەند بۆرد و هۆبە و یەکەیەک پێکدێت:
یەکەم/ بۆردەکانی سەنتەر:
بۆردی ئەکادیمی: بریتین لە هەڵگرانی بڕوانامەی ماستەر و دكتۆرا، كە جێگەی ڕاوێژن بۆ كاروباری سەنتەر.
بۆردی ڕاوێژکاری: بریتین لەو كەسایەتییانەی كە خاوەن ئەزموون و نووسینن لە بواری ئەنفال و جینۆسایددا.
تێبینی/ لە نێوان ئەم دوو بۆردەدا هەماهەنگی لە كاروبارە پەیوەندیدارەكاندا دەبێت.
دووەم/ هۆبەکانی سەنتەر:
ا/ هۆبەی زانستی: لەم هۆبەیەدا پسپۆرییەكانی (یاسایی، مێژوویی، كۆمەڵایەتی، دەروونناسی، ڕاگەیاندن، توێكاری (DNA)، زمانەوانی، ئەدەبناسی، ئابووری، ئەرشیفی، ...هتد) هەر بوارێكی تری پەیوەست بە ئەنفال و جینۆساید كۆدەكرێنەوە و بەم شێوەیە ڕێكدەخرێت:
یەکەی توێژینەوە: لەم یەكەیەدا توێژینەوەی زانستیی جۆراوجۆری یاسایی، مێژوویی، كۆمەڵایەتی، دەروونناسی، ڕاگەیاندن، توێكاری (DNA)، زمانەوانی، ئەدەبناسی، ئابووری، ئەرشیفی و ... تایبەتمەند لەسەر هەموو لایەن و لێكەوتەكانی تاوانی ئەنفال و جینۆساید و تاوانە ناوخۆیی و نێودەوڵەتییەكانی تر ئەنجامدەدرێت.
یەکەی وەرگێڕان: كاری ئەم یەكەیە وەرگێڕانی هەموو ئەو بابەت و كارانەیە، كە تایبەتن بەم تاوانانە.
یەکەی پەروەردەیی و دەروونی: كاری ئەم یەكەیە تایبەتە بە لێكۆڵینەوەی دەروونی لەسەر بەركەوتووانی ئەم تاوانانە و دۆزینەوەی ڕێگەچارەی دەروونی و پەروەردەیی بۆ زیانلێكەوتووان.
ب/ هۆبەی دۆکیومێنتەری: ئەم هۆبەیە لە چەند یەكەیەك پێكدێت:
یەکەی هونەر و سینەما: كاری ئەم یەكەیە تایبەتە بە كارە هەونەرییەكانی ئەم بوارە.
یەكەی مێژووی زارەکی: كاری ئەم یەكەیە كۆكردنەوە و تۆماركردنی (دەنگی و ڕەنگی ـ ڤیدیۆیی)، مێژووی زارەكی لە ڕێگەی چاوپێكەوتن لەگەڵ كەسوكار و بەجێماوانی ئەنفالدا.
یەکەی مۆزەخانە و بەڵگەنامەکان: كاری ئەم یەكەیە سەرپەرشتیكردنی مۆزەخانە و كۆكردنەوە و پاراستنی بەڵگەنامە جۆراوجۆرەكانی ئەم تاوانانەیە.
پ/ هۆبەی ڕاگەیاندن و چالاکی: ئەم هۆبەیە لە چەند یەكەیەك پێكدێت:
یەکەی چالاکییە زانستییەکان: كاری ئەم یەكەیە تایبەتە بە ئەنجامدان و ڕێكخستنی سیمینار و كۆڕ و كۆبوونەوە جۆراوجۆرەكان و چەندین چالاكیی زانستی تر، كە سوود بە كەیسەكان و ناساندنیان بگەیەنێت.
یەکەی بڵاوکراوەکان: كاری ئەم یەكەیە كاروچالاكی و بەرهەمەكانی سەنتەرەكە بڵاودەكاتەوە.
ت/ هۆبەی پەیوەندییەکان: ئەم هۆبەیە لە چەند یەكەیەك پێكدێت:
یەکەی یاسایی: كاری ئەم یەكەیە سەرپەرشتی كاروباری یاسایی و ڕاوێژكاریی كارەكان و بەدیهێنانی كارەكانی سەنتەر دەكات.
یەکەی کۆمەک و هاوکاری: كاری ئەم یەكەیە كۆكردنەوەی كۆمەك و هاوكارییە لە لایەنە ناوخۆیی و دەرەكییەكان بۆ بەدیهێنانی ئامانجەكانی سەنتەر.
ت/ هۆبەی کارگێڕی: ئەم هۆبەیە لە چەند یەكەیەك پێكدێت:
یەکەی خۆیی و ئەرشیف: كاری ئەم یەكەیە تایبەت بە نوسراوە هاتوو و ڕۆیشتووەكان.
یەکەی ژمێریاری: كاری ئەم یەكەیە تایبەت بە كاری ژمێریارییەوە.
یەکەی هونەری: كاری ئەم یەكەیە تایبەت بە لیژنەی ئامادەكردن و ڕێكخستن و هونەرییەوە.
فەرمانبەران:
1/ سەركەوت توفیق سدیق: لێپرسراوی هۆبەی دۆکیومێنتەری و ڕاگەیاندن و چالاکی.
2/ دینا محمود ستار: لێپرسراوی هۆبەی کارگێڕی.